ការ​ញុំា​អាហារ​ពេល​យប់​ជ្រៅ មិន​ល្អ​​ចំពោះ​សុខភាព​ឡើយ

 (សុខភាព)៖ ការដែលទំងន់ខ្លួនឡើងមិនឈប់ បណ្តាលមកពីកត្តាមួយចំនួន គឺចេះតែទទួលទានអាហារបន្ថែម នៅពែលយប់ជ្រៅ។ ដើម្បីជៀសវាសបញ្ហានេះអ្នកត្រូវ៖

១.មិនត្រូវអត់អាហារពេលល្ងាចៈ ប្រសិនបើអ្នកដឹងថា អ្នកត្រូវនៅដល់យប់ជ្រៅ អ្នកគួរទទួលទានអាហារពេលល្ងាច និងទទួលអាហារនៅក្នុងបរិមាណសមរមទៀតផង ដើម្បីមិនឲ្យមានអារម្មណ៍ឃ្លាន នៅពេលយប់ជ្រៅ។

២. ទទួលទានបង្អែមបន្តិចបន្តួចៈ ការបង្អត់ជាតិផ្អែម និងធ្វើឲ្យអ្នកកាន់តែមានអារម្មណ៍ ចង់ទទួលទានទៅវិញទេ ដូច្នេះនៅពេលបញ្ចប់អាហារពេលល្ងាច អ្នកគួរតែទទួលទានបង្អែម មួយចានតូច ជាការបញ្ចប់ការទទួលទានអាហារ សម្រាប់ថ្ងៃនេះ។ អ្នកដែលមិនទទួលទានបង្អែមសោះ នឹងធ្វើឲ្យអ្នកមានអារម្មណ៍ត្រូវការជាតិស្ករ ហើយតែងតែមានលេសថា ថ្ងៃនេះមិនទាន់បានទទួលទានអ្វី ផ្អែមនៅឡើយទេ រួចក៏ត្រូវរកសូកូឡា មួយដុំ ទម្រាំតែដឹងខ្លួន ទម្ងន់ឡើង២ទៅ៣គីឡូក្រាម បាត់ទៅហើយ។

៣.ដុសធ្មេញភ្លាមៗ: បន្ទាប់ពីអាហារពេលល្ងាច អ្នកមិនគួរងូតទឹកភ្លាមៗនោះទេ ព្រោះឈាមកំពុងតែចិញ្ចឹមក្រពះ ការងូតទឹកត្រជាក់ និងធ្វើឲ្យប្រព័ន្ធរំលាយអាហារ ផ្អាកដំណើរការ រហូតធ្វើឲ្យកើតមានអាការហើមពោះ ឆ្អល់ពោះបាន ប៉ុន្តែអ្នកអាចដុសធ្មេញបាន ដើម្បីដាស់តឿនខ្លួនឯងមិនឲ្យទទួលទានអ្វី បន្ទាប់ទៀត។

៤. សសេរដាស់តឿនខ្លួនឯងៈ អ្នកអាចសសេរខ្លឹមសារដាស់តឿនខ្លួនឯង នៅលើក្រដាស់ដូចជា «ចង់ស្អាតមិនត្រូវញុំាអាហារពេលយប់» ឬ «អ្នកណាញុំអាហារពេលយប់សូមឲ្យធាត់» ជាដើម ហើយអ្នកអាចបិទរូបថតសង្សារ របស់អ្នកទៅនឹងទូទឹកកក ឬទូដាក់អាហារ ដើម្បីបញ្ឈប់ខ្លួនឯង។

៥. ត្រៀមទឹកស៊ីរ៉ូមួយកែវៈ ការដែលមានអារម្មណ៍ហេវ គឺបណ្តាលមកពីជាតិស្ករ នៅក្នុងឈាមមានការថយចុះ ដូច្នេះគ្រាន់តែទទួលទានទឹកស៊ីរ៉ូផ្អែមៗ មួយកែវ ក៏អាចជួយបំបាត់ការឃ្លានបានដែរ ដោយមិនចាំបាច់ញុំានំសូកូឡា ឬនំផ្អែមៗនោះឡើយ៕