ការបង្ក្រាបគ្រឿងញៀនទ្រង់ទ្រាយធំ នឹងត្រូវប្រគល់រង្វាន់ ១ ម៉ឺនដុល្លារ
ភ្នំពេញៈ លោក កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀនកាលពីម្សិលមិញបានប្រកាសផ្តល់រង្វាន់ ១ ម៉ឺនដុល្លារ ដល់មន្រ្តីនគរបាលចំពោះការបង្ក្រាបគ្រឿងញៀនទ្រង់ទ្រាយធំ ខណៈអគ្គលេខាធិការនៃអាជ្ញាធរនេះគឺលោក មាស វីរិទ្ធ ថា រង្វាន់ធ្លាប់បានផ្តល់ឲ្យមន្ត្រីបីករណីមកហើយ។
លោក វីរិទ្ធ បានថ្លែងថា៖ «យើងចង់ប្រកាសថា ពួកគេត្រូវបានយកចិត្តទុកដាក់» ដោយលោកពន្យល់ថា អាជ្ញាធរសង្ឃឹមថា ការប្រកាសនេះនឹងលើកទឹកចិត្តដល់មន្រ្តីដទៃៗទៀតផងដែរ។
លោក កែ គឹមយ៉ាន ត្រូវបានដកស្រង់ដោយប្រព័ន្ធផ្សព្វផ្សាយ Fresh News ថា៖ «មន្រ្តីដែលចាប់បានគ្រឿងញៀន ១ គីឡូទទួលបានរង្វាន់ ១០ ពាន់ដុល្លារជាផ្នែកនៃយុទ្ធនាការប្រឆាំងគ្រឿងញៀន»។
រង្វាន់នេះត្រូវផ្តល់ឲ្យដោយថវិកាជាតិព្រមទាំងទ្រព្យសម្បត្តិដែលរឹបអូសបានពីឈ្មួញ។
លោក រីរិទ្ធ បានច្រានចោលការលើកឡើងដែលថា ការផ្តល់រង្វាន់អាចនាំឲ្យមានអំពើពុករលួយ។
លោក រីរិទ្ធ បន្ថែមថា៖ «វាមិនមែនមានន័យថា ពួកគេចាប់ខ្លួនពួកគេហើយប្រមូលទ្រព្យសម្បត្តិទុកសម្រាប់ខ្លួនឯងទេ។ វាជារង្វាន់តាមមាត្រា៩៧នៃច្បាប់ស្តីពីគ្រឿងញៀន»។
លោក David Harding អ្នកជំនាញឯករាជ្យខាងគ្រឿងញៀន បានថ្លែងថា លោកសង្ស័យការផ្តល់រង្វាន់នេះនឹងនាំឲ្យមានអំពើពុករលួយ ប៉ុន្តែបានថ្លែងថាវាមិនទំនងជាធ្វើឲ្យរារាំងដល់ «សង្គ្រាមប្រឆាំងគ្រឿងញៀន» ទេ។
លោកបន្តថា៖ «វាបង្ហាញថា ពួកគេមិនចាំបាច់ធ្វើការខ្លួនឲ្យល្អ» ហើយកិច្ចខិតខំគួរផ្តោតលើការចាប់ខ្លួន «មេខ្លោងសំខាន់បំផុត»។
លោកថា៖ «អ្នកកាន់គ្រឿងញៀនមិនមែនជាអ្នកដែលអ្នកត្រូវការចាប់ទេ...ពួកគេគ្រាន់តែជាអ្នករត់ពន្ធ អ្នកតូចតាច»។
តាមរបាយការណ៍នគរបាលពីម្សិលមិញថា មានការបង្ក្រាបគ្រឿងញៀនចំនួន ២ ៦៤២ ករណី និងចាប់មនុស្សបានចំនួន ៥ ៩៩៧ នាក់នៅដើមឆ្នាំនេះ៕ PS
Post a Comment